Hjá Sameinuðu þjóðunum

Í sextánda sinn voru greidd atkvæði um viðskiptabann Bandaríkjanna á Kúbu á Allsherjarþingi Sameinuðu þjóðanna 30. október s.l. Aðeins Bandaríkin, Ísrael, Marshalleyjar og Palau greiddu atkvæði gegn ályktun um að viðskiptabannið skuli afnumið, Mikrónesía sat hjá.

Þar tókust á bandaríski fulltrúinn Ronald Godard og utanríkisráðherra Kúbu Pérez Roque. Sá bandaríski hélt því fram að viðskiptabannið snerti aðeins Bandaríkin og Kúbu og ætti ekki að vera á dagskrá SÞ. Hinn síðarnefndi taldi það hafa haft bein áhrif í  að minnsta kosti 30 öðrum löndum. Nýtt er að aðgerðir bandaríska fjármálaráðuneytisins á sviði alþjóðlegra bankaviðskipta trufla greiðslur og samskipti kúbanskra fjármálastofnana við umheiminn.

Viku fyrr undirbjó George Bush málflutning fulltrúa síns með tilkynningu um ýmsar ráðstafanir. Hann vildi að ríkisstjórnir greiddu í “Frelsissjóð” sem fjármagnar andstöðuhópa á Kúbu. Auk þess boðaði hann stuðning við að tölvuvæða frjáls félagasamtök og trúarhópa, og veitingu námsstyrks til kúbanskra námsmanna. Þetta sagði Roque bráðfyndið, á Kúbu væru 600 klúbbar sem veittu ókeypis aðgang að internetinu og tvær milljónir notfærðu sér þá á hverju ári. Þar væru 65 háskólar þar sem 730.000 kúbanskir háskólanemar stunda nám auk 30.000 háskólanema frá öðrum löndum á námsstyrk.

Meðan þessu fór fram fengu nokkrir bandarískir athafnamenn fangelsisdóma fyrir að ferðast til Kúbu: Victor Vázquez fékk tveggja ára óskilorðsbundið fangelsisdóm og kona hans skilorðsbundinn fyrir samsæri um að rjúfa ferðabannið, og David Margolis tvö ár á skilorði fyrir að þykjast fara í kirkjulegum erindum til Kúbu.

Athugasemdir

[benedikt (IP-tala skráð) 24.11.2007 kl. 17:34]

auk þess sem kostnaður við viðskitabannið er tllin ´´i milljurðum dollara fyrir Kúbu