Hæstiréttur BNA tekur fyrir beiðni um endurupptöku

Krafa um endurupptöku máls fimm manna frá Kúbu sem sitja í bandarískum fangelsum, verður tekin fyrir í Hæstarétti Bandaríkjanna 7.  júní n.k. Máli þeirra er lýst hér á vefsíðunni, næst á undan.
Lögmenn mannanna fimm hafa lagt fyrir réttinn beiðni um að rétturinn úrskurði um hvort réttað hafi verið yfir skjólstæðingum þeirra á sanngjarnan hátt. Í fyrsta lagi að  mennirnir hafi verið dæmdir í  Miami af kviðdómi þar sem saksóknari ruddi út sjö kviðdómurum sem voru blökkumenn. Í öðru lagi að dómari í máli þeirra leyfði ekki að skipt yrði um varnarþing þótt ljóst væri að aðstæður í Miami væru þeim afar andstæðar. Í þriðja lagi að rétturinn álykti að margfaldur lífstíðardómur eins fimmmenninganna Gerardo Hernández, sýni hversu fjandsamleg réttarhöldin hafi verið. Hernández var dæmdur án sannanna fyrir samsæri um morð.
Olga Salanueva, eiginkona eins fimmmenninganna René Gonzáles, skýrði frá málinu á alþjóðlegri ráðstefnu ungmenna á Kúbu í byrjun maí. Hún var handtekin ásamt manni sínum en síðan vísað frá Bandaríkjunum og hefur ekki fengið leyfi til að koma og heimsækja hann. Hún sagðist alltaf vera bjartsýn en að raunveruleikanum mætti ekki sleppa. „Allir yrðu ánægðir ef Hæstiréttur lýsti þá saklausa. En þetta er ekki sakamál heldur augljóslega pólitískt mál.“ Hún benti á hliðstæðu, þ.e. mál Nelsons Mandela og þekktra liðsmanna í sjálfstæðisbaráttu Puerto Rico. Þessir menn sátu inni í áratugi áður en þeim var sleppt úr haldi. Þeir fengu lausn sinna mála vegna alþjóðlegs þrýsting s frá almenningi en ekki gegnum réttarkerfið.
Forseti þingsins á Kúbu sagði við sama tækifæri að bandarísk yfirvöld gætu með pennastriki látið ofsóknum á hendur fimmmenningunum linna og að beina skuli kröfum um það til þeirra.
Meðal stuðningsmanna mannanna fimm eru: Desmond Tutu, Nelson Mandela, Nadine Gordimer, Rigoberta Menchú, Adolfo Pérez Esquivel, José Saramago, Jose Ramos Horta, Dario Fo,  Noam Chomsky, James Petras, Alice Walker, judge i.r. Claudia Morcom, Günter Grass,  o.fl.